– Vi har førebudd oss på høgare sjukefråver blant våre tilsette, og det har slått til. Vi klarer per i dag å oppretthalde planlagde operasjonar og konsultasjonar, men er avhengig av å førebygge smitte i størst mogleg grad i føretaket. Vi skal både skjerme pasientane i Møre og Romsdal og sørge for at vi har nok personell på jobb til ei kvar tid, fortel fagdirektør, Erik Solligård. 

Regjeringa opna samfunnet og fjerna alle forskriftsfesta tiltak laurdag 12. februar. I tillegg er det gitt føringar for at sjukehusa skal tilrettelegge for at smitta kan bli med på fødsel og kunne besøke alvorleg sjuke. 

– Vi har også fram til no lagt til rette for besøk til kritisk sjuke etter avtale med aktuell avdeling. No jobbar vi med å finne ei trygg løysing under fødsel, fortel fagdirektøren.  ​

 

Den største risikoen ved smitte er per no ikkje alvorleg sjukdomsforløp, men sjukefråver blant tilsette som kan gi større driftsutfordringar. Helse Møre og Romsdal viderefører grønt beredskapsnivå (ein skjerpa beredskap) for å følge smittesituasjonen tett og fortløpande vurdere konsekvensane den har for sjukehusdrifta.