Dagkirurgi Ålesund

Vi utfører inngrep innan følgande fagområde: auge, øyre-, nase- og halskirurgi, ortopedi, gynekologi, generell kirurgi, mamma- og endokrinkirurgi, karkirurgi, urologi, tannkjeve-kirurgi og tannlegebehandling i narkose. Det blir utført medisinske undersøkingar som gastro-koloskopiar på barn og bronkoskopiar i anestesi. Vi behandlar omlag 5 000 pasientar per år, og mange av våre pasientar er barn.

Moderne lokale

Vi har operasjonsstover med fasilitetar og teknologiske løysingar som gir gode vilkår for framtidsretta operasjonar i seks operasjonsstover. På overvakinga er det plass for 19 overvakingseiningar med to einerom. Vi har eigen avskjerma leikeplass for barn.

Kompetanse

Personalet som arbeider fast ved seksjonen er spesialsjukepleiarar, sjukepleiarar og assistentar. Anestesipersonalet er tilknytt anestesiseksjonen, men fleire av dei har sin faste arbeidsstad ved Dagkirurgisk seksjon. Vi jobbar tverrfagleg med kirurgar, medisinske legar og anestesilegar, og har svært gode rutinar for mellom anna smertelindring. Ulike former for nerveblokadar blir nytta for at pasienten skal få det best mogleg under inngrepet og i tida etterpå. Vi er stolte av å ha mange dyktige kirurgar som kan gi den beste behandlinga innanfor sine fagfelt. Det store og gode fagmiljøet ved Ålesund sjukehus gjer at vi kan tilby ei trygg og sikker behandling.

Dagkirurgisk seksjon er også ein ettertrakta læringsstad for ulike studentar og legar i spesialisering (LIS). Frå studie ved NTNU Ålesund tek vi imot bachelorstudentar i sjukepleie, og spesialstudentar som tek videreutdanning i anestesi eller operasjon. Ålesund sjukehus har medisinstudentar som har delar av sin praksisplass på operasjonsstovene under kyndig opplæring.

Ei god pasientoppleving

Vår visjon er at vi skal skape framtidas dagkirurgi og målet vårt er ei god pasientoppleving.

Personalet ved Dagkirurgisk seksjon jobbar etter prinsippet for kontinuerleg forbetring. Mange prosjekt er avslutta og implementert, og fleire er på gang. Det landsomfattande Pasienttryggleiksprogrammet er vi ein del av, der vi gjennomfører Trygg Kirurgi på alle operasjonar med anestesi. Vi er opptatt av kvalitet på tenestene våre, og å ha ein arbeidsstad som gir rom for forsking, kontinuerleg læring og kvalitetsutvikling. Det bidrar til ei god og effektiv pasientbehandling som pasientane våre er nøgde med.

Velkomen til oss!