DPS poliklinikk Molde

Det blir gjeve tilbod om ulike behandlingstilnærmingar innanfor gjeldande nasjonale retningslinjer og anbefalingar. Dette kan vere ulike former for psykoterapi individuelt, i gruppe eller ein kombinasjon, samt medikamentell behandling. Vi har kompetanse innanfor fleire terapiretningar for ulike psykiske lidingar. Vi samarbeider med fastlegar, NAV og andre relevante instansar.

Helse Møre og Romsdal HF har fire distriktspsykiatriske senter (DPS), der eitt av desse held til på Knausenteret i Molde. Molde DPS består av to seksjonar, ein poliklinikk og ein døgnseksjon som samarbeider nært. Opptaksområdet til DPS Molde er innbyggarane i kommunane Vestnes, Rauma, Sunndal, Gjemnes, Hustadvika, Molde og Aukra.

DPS poliklinikk Molde har organisert tilboda i ulike behandlingsteam:

• Allmennteama er tverrfagleg samansett med kompetanse innanfor ulike faglege tilnærmingar, og utgreier og behandlar eit breitt spekter av psykiske lidingar.
• Gruppebehandlingsteamet  gjev tilbod om gruppebehandling innanfor ulike typar psykodynamisk terapi av ulik varigheit, for personar med eit breitt spekter av psykiske lidingar.
• ROP-teamet gjev tilbod om poliklinisk utgreiing og integrert behandling av samtidig psykisk liding og skadeleg bruk av rus/rusavhengnad.
• DBT-teamet (ROBUST) gjev tilbod om behandling for personar med sterke ustabile kjensler som er vanskelege å handtere, og kor ein ofte brukar sjølvøydeleggande strategiar for å meistre kjenslene. Behandlingsprogrammet inneheld individuell time og ferdigheitsgruppe kvar veke. Tilbodet er fylkesdekkande. 
• B4DT-teamet gjev tilbod om spesifikk angstbehandling etter firedagars-modellen for panikkliding, sosial fobi og tvangsliding, og vidareutvikling av denne modellen. Behandlinga av tvangsliding er eit fylkesdekkande tilbod.
• Ambulant psykoseteam gjev tilbod om ambulant behandling for pasientar med alvorleg psykisk liding som ikkje greier å nyttiggjere seg andre tilbod, med utgangspunkt i tilnærminga til FACT-modellen. 
• Ambulant Akutteam tilbyr rask og tidsavgrensa intervensjon ved akutt forverring av psykiske lidingar eller akutte kriser. Alle kan ta direkte kontakt med teamet, ikkje naudsynt med tilvising. Opningstid 08:00 – 15:30 på kvardagar.