Poliklinikk barn og ungdom Ålesund

Allergivaksinering av barn og ungdom ved Ålesund sjukehus

Allergivaksinering blir og kalla hyposensibilisering eller spesifikk immunterapi. Dette er aktuelt ved kraftig allergi, særleg mot pollen og bie- og vepsegift, men unntaksvis også mot dyrehår eller husstøvmidd.

Innleiing

Barnet må vere over fem år og ha hatt symptom på problematisk allergi over minst to år. Det må ligge føre positiv allergitest (prikktest eller blodprøve) på aktuelle allergen.
Prinsippet for behandlinga er å tilføre allergenet (det ein er allergisk mot) regelmessig over lang tid (3 år, evt. 5 år), og dermed endre kroppen/immunforsvaret sin reaksjon på allergenet ved «vanleg» kontakt via hud/slimhinner. Ein vel då ut eitt eller to allergen som utgjer hovudproblemet.

Før

Dersom barnet/ungdomen har ein infeksjonssjukdom (forkjøling, influensa, bronkitt eller liknande) dei siste tre dagane før planlagt vaksinasjon, må vaksineringa utsetjast.

Blir du sjuk eller hindra frå å møte opp, skal du kontakte oss og avtale ny tid.

Under

Ved behandling av bjørk-, gras-, katt-, husstøvmidd-allergi osv. blir dette gjort i form av injeksjonar (sprøyter) i overarma. Det er vanleg at dette går føre seg som opptrapping med ei dose kvar veke i sju veker. Deretter gradvis overgang til ei dose annakvar månad i tre år. Dei første gongane får ein to-tre sprøyter med 30 minutt mellomrom. Ein behandlingsdag kan då ta omlag to timar.

Ved behandling av graspollenallergi kan dette også gjerast i form av smeltetablettar med graspollen-ekstrakt (Grazax) dagleg over tre år. Første tablett blir teke under observasjon på poliklinikken, og ein kan normalt forlate avdelinga etter 30 minutt. Vanlege biverknadar er kløe/svie/ubehag i munnhola nokre minutt etter inntak. Behandlinga elles foregår heime med kontroll hos lege ei stund etter oppstart og i etterkant av graspollensesongen.

Etter

Det er under heile behandlinga ein risiko for at vaksinasjonane kan utløyse allergisymptom, særleg under den første delen med doseøkinga. For sikkerheits skuld skal barnet difor alltid vere på avdelinga for observasjon i 30 minutt etter kvar vaksinasjon. Vi gjer eventuelt lungefunksjonstest (PEF) før og etter vaksinasjon. Dei mest vanlege biverknadane er hevelse/kløe/ubehag på innstikkstaden.

Vi anbefaler at ein ikkje driv fysisk aktivitet/høgintens påkjenning på vaksinasjonsdagen. Ved biverknader ut over kløe/ubehag på innstikkstaden bør dette behandlast med allergimedisin, eventuelt kontakt lege.

Kontaktinformasjon

Informasjon om timeavtale og besøk

Har du fått innkalling til time, er blodgivar eller skal besøke nokon på sjukehuset?

Sjå våre smitteverntiltak og gjeldande rutinar

Kart og parkering

Besøksparkering på tilvist stad på sjukehusområdet, sjå kart under.

Merk at du alltid må registrere bilnummeret på parkeringsautomat eller i EasyPark-appen ved ankomst
Vi anbefaler betaling med kort framfor mynt. Då kan du velje P-tid med god margin slik at du unngår stress for å nå parkeringstida. Kjem du tilbake før utløpt tid kan du avslutte ved å sette inn kortet igjen. Du betaler då kun for brukt parkeringstid
Det er også mogleg å betale med mynt, men då må du tilbake til automaten viss du må forlenge parkeringstida. Du får heller ikkje refundert beløp om du forlater plassen tidlegare
Appen EasyPark er også eit godt betalingalternativ

Ring på når du kjem til oss

Døra inn til barne- og ungdomsavdelinga er låst heile døgnet. Ring på når du kjem til avtale hos oss.

Praktisk informasjon

Endre/avbestille time

Må du avbestille eller endre time, så ber vi deg ta kontakt med vår ekspedisjon - på telefon. Det er viktig at ringer så snart som råd og seinast innan 24 timar før avtalt time. Unytta timar som ikkje blir varsla vil bli fakturt. Ekspedisjonstida er frå måndag til fredag, kl 08.00 – 15.30.

Barn som pårørande

Barn og unge blir påverka når nokon i familen blir sjuke. Dei treng å forstå kva som skjer. Vi på sjukehuset skal bidra til at barn og ungdom blir tatt godt vare på i slike situasjonar.

Les om kva vi gjer for barn og ungdom som er pårørande

Foreldre/føresette kan følge barnet til time på poliklinikken

Foreldre/føresette kan følge barnet til time på poliklinikken. På grunn av at ein stor del av pasientane hos oss ikkje er vaksinerte og vi forventar ei stor auke i luftvegsinfeksjonar denne hausten/vinteren, er det ikkje moglegheit for andre til å bli med.

Internett/Wifi

Pasientar og besøkande kan bruke gratis trådlaust internett i deler av sjukehuset, men diverre ikkje i alle avdelingar/etasjar enno. Utbygging av dekninga pågår. Sjå etter GjestenettHMN på mobil eller datamaskin.

Passord på SMS
Når du opnar nettlesaren får du opp ei side der du kan bestille gratis passord for å logge deg på nettet. Dette passordet varer ei veke. Du blir bedt om å legge inn mobilnummeret ditt, og får då tilsendt eit passord på SMS.

Ladestasjon for el-bil

Vi har fått ladestasjonar for el-bil ved alle dei fire sjukehusa. Her finn du ladestasjonen ved ditt sjukehus:

No kan du lade el-bilen ved sjukehusa

Parfyme

Vi ber om avgrensa bruk av parfyme, då det er mange av pasientane våre som reagerer på dette.

Dette gjeld også ved poliklinisk time på sjukehuset.

Pasienthotellet

Næraste alternativ for pasientar og pårørande som treng overnatting er pasienthotellet på Åse.

Åse hotell

Preste- og samtaletenesta

Treng du nokon å snakke med?
Prestetenesta er tilgjengeleg for å lytte til deg, om du berre vil slå av ein prat eller dele ting du tenker på.

Prestetenesta si viktigaste oppgåve er samtalar med pasientar og pårørande. Dei tilbyr også undervising, rettleiing, og samtalegrupper, både for pasientar og tilsette.

Presten og diakonen er her for alle, og kan formidle kontakt med andre trussamfunn, religionar eller livssynsorganisasjonar.

Kontaktinformasjon og meir om prestetenesta

Reise og tilkomst

Pasientreiser er reiser til og frå offentleg godkjent behandling. Sjukehuset har ansvaret for pasientreiser og dekker rimelegaste reisemåte for pasienten. Meir informasjon om pasientreiser finn du på helsenorge.no

Buss

Fram Ekspress og alle andre bussar går innom busslomma ved sjukehuset i Volda og i Ålesund. Unntak: Flybussen i Ålesund stoppar berre ved busslomme oppe ved hovudvegen. I Molde og Kristiansund går ikkje Fram Ekspress til sjukehusa, men korresponderer med bybuss i begge byane.

Fly
Molde lufthavn, Årø ligg om lag 7 km frå Molde sjukehus.

Kristiansund lufthavn, Kverberget ligg om lag 8 km frå Kristiansund sjukehus.

Ørsta-Volda lufthamn, Hovden ligg om lag 8 km frå Volda sjukehus

Ålesund lufthavn, Vigra ligg om lag 23 km frå Ålesund sjukehus.

Servicetorget

Du finn oss i hovudvestibylen. Ta kontakt med oss om du treng vegskildring til avdelinga du skal besøke, om du har behov for å betale poliklinikk-timen din kontant, hjelp til å bestille drosje, eller andre serviceoppgåver.

Opningstid

07.30–15.30

Sjukehusapoteket i Ålesund

Apoteket ligg på nordsida av sjukehuset, nær inngangen til poliklinikkane.

Opningstider og kontaktinformasjon finn du på sjukehusapoteket sine sider

Spisestader

Kantina

Vi har god heimelaga mat, varme og kalde rettar, til gode prisar.

Du finn oss i 1. etasje. Velkomen!

Opningstider:

Måndag til fredag: kl 09.00 - 15.00
Helg og høgtid: stengt

Kiosk

I tillegg har vi kiosk i hovedvestibylen ved sjukehuset.