Raskare røntgendiagnostikk med kunstig intelligens

Akuttmottak og ortopediske avdelingar har lenge vore prega av lange ventetider og overbelastning. Innføringa av KI-løysingar gjer klinikarane betre rusta til å møte desse utfordringane. Til dømes har Vestre Viken oppnådd betydelige innsparingar ved å sende heim pasientar som ikkje treng vidare tilsyn. Helse Møre og Romsdal forventar tilsvarande resultat med implementeringa av teknologien i heile regionen.

– Dette kjem til å spare mykje tid, seier prosjektleiarane Ida Fallmyr Jørgensen og Endre Grøvik.  

– Tidlegare har pasientar ofte venta i to til tre timar - spesielt på natt, kveld eller i helgene - etter røntgen for å få svar på om dei har brot. No kan dette betrast betrakteleg.

Raskare røntgenanalyse

Prosjektleiarane fortel at programmet BoneView er eit avgjerdsstøtteverktøy som analyserer røntgenbilete av skjelettet under nakkenivå for pasientar over to år. Verktøyet er trent til å oppdage brot, væske i ledd og ledd som er ute av stilling.

– BoneView kan analysere bilete og identifisere brot på berre eitt til to minutt, forklarar Jørgensen.

– Systemet gir tre moglege svar; ingen funn, moglege funn med usikkerheit, eller sikre funn av brot. Dette gjer det mogleg for radiografar å raskt avgjere om pasienten kan sendast heim eller treng vidare behandling.

Avdelingssjef ved akuttmottaket på Ålesund sjukehus, Elin Dybvik, ser på prosjektet som ein stor gevinst for pasientane.

– Dette er ein vinn-vinn-situasjon. Pasientar utan alvorlege skader kan reise heim mykje tidlegare, medan ortopedane får frigjort meir tid til dei som treng det mest. Slik kan vi få ned ventetidene på akuttmottaka.

Fortsatt fokus på kvalitetssikring

Sjølv om KI gjer prosessane raskare, er det framleis radiologane si vurdering som er endeleg. Alle bileta som BoneView vurderer, blir også granska av radiologar for å sikre korrekt diagnostikk. Erfaringar frå andre regionar viser at tilfelle av falske positive eller negative resultat er sjeldne.

– Diagnostisk nøyaktigheit blir ikkje endra, understrekar Kristian Kolnes, overlege i radiologi ved Volda sjukehus.

– Radiologen si vurdering er fasiten, og slik har det alltid vore.

Rask utvikling 

– Dette er første veka vi køyrer BoneView i sanntid, så det er for tidlig å seie noko om forskjellen før og etter, seier Martin Grotnes, overlege i radiologi ved Molde sjukehus.

– Vi har også berre vore kjent med korleis dette fungerer i to-tre år. Kunstig intelligens i radiologi har utvikla seg relativt raskt, og dei første forsøka på å ta dette i bruk hadde sine ulemper. No ser vi at systemet har blitt mykje meir presist og nyttig. Den store testen kjem no når systemet setjast i klinisk drift, og påverkar pasientbehandlinga direkte.

Grundig testing og fruktbart samarbeid 

Innføringa av KI-teknologien har vore nøye planlagd gjennom ein skuggeperiode der spesialistar og brukarar har tilpassa og optimert arbeidsflyten. Både internt samarbeid og samarbeid med andre helseføretak i Helse Midt-Norge har sikra ei harmonisert implementering.

– Vi har sett eit stort engasjement frå den tverrfaglege gruppa i regionen, seier Jørgensen.

 – Dette har vore eit givande arbeid som har lagt grunnlaget for framtidige prosjekt. Eg vil gjerne gi ein stor honnør til dei tilsette som har lagt ned mange arbeidstimar og stort engasjement for å få på plass dette.

Framtidsutsikter og vidare utvikling 

Kolnes vil framheve at det viktige med prosjektet er ikkje berre at dei tek i bruk sjølve programmet og eigenverdien av dette, men at dei får øvd seg i å lage infrastruktur og prosedyrar for implementering av KI.

– Dette blir langt frå det einaste KI-programmet som kjem til å bli nytta innan radiologi i åra som kjem, seier Kolnes.

Grøvik, som er medisinsk fysikar og forskingsgruppeleiar, har jobba med KI-forsking innan bildediagnostikk i snart sju år.

– Det er utruleg spennande å vere i gang med det som forhåpentlegvis blir ei brei implementering av KI-verktøy i helseføretaket, seier Grøvik.

–  Eit overordna mål med dette prosjektet er å bygge erfaring og kompetanse rundt klinisk implementering av slike verktøy. På den måten vil vi vere godt rusta til å støtte og rettleie framtidige initiativ der andre fagmiljø i Helse Møre og Romsdal ønsker å ta i bruk KI-verktøy.