Studietur til Zimbabwe med kjevekirurgi som tema

Det var oralkirurgane Lado Lako Loro og Paul Åsmund Vågen saman med seksjonsleiar og sjukepleiar Reidun Oddbjørg Lunde som reiste. Dei besøkte det medisinske fakultetet ved Universitetet i Zimbabwe, Parirenyatwa universitetssjukehus og Sally Mugabe barnesjukehus.

Donerte utstyr frå Ålesund sjukehus

Loro fortel at sjukdom i munn- og kjeveregionen er svært utbreidd i det afrikanske landet. – Dei to offentlege sjukehusa i Harare er overvelda av pasientar som er tilvist frå heile Zimbabwe. Fasilitetane og ressursane er forferdelege.

Men Loro legg til at det er likevel veldig imponerande og rørande å sjå korleis dei tilsette er i stand til å utføre arbeidet sitt trass situasjonen. – Vi har donert utstyr til dei frå Ålesund sjukehus. Dette har blitt svært godt mottatt, og vil definitivt kome til nytte.

Verdifull erfaringsutveksling

Under besøket fekk teamet observere både kjeveoperasjonar og leppe-ganespalteoperasjonar på universitetssjukehuset og barnesjukehuset. Dei vitja òg to private klinikkar, og heldt førelesing for kjevekirurgar, spesialistkandidatar og tannlegar i Harare.

Ny tur i juni

Loro og Vågen skal tilbake til Afrika i juni, og denne gongen skal spesialtannlege Frank-Jakob Sandbakk vere med.

– Kollegaene våre i Zimbabwe har bedt om hjelp og opplæring i ortognatisk kirurgi, særleg ved tilfelle av leppe- og ganespalte. Planen er å operere på desse pasientane saman med dei lokale kirurgane, seier Loro. – Dette vil forsterke samarbeidet vårt.

Les også: Desse to skal lage kjevebein - med bruk av stamceller - Helse Møre og Romsdal

Til slutt vil Loro takke Seksjon for forsking og innovasjon for å ha gitt teamet ei moglegheit gjennom såkornmidlar til å reise på denne studieturen.

​Vil du vite meir om forskingsrelatert aktivitet knytt til Helse Møre og Romsdal? Følg @forsking_hmr på Instagram!