Heiderspris til Annemarie Haag-Kvernberg
Kvart år deler Leger i ortopedisk spesialisering (LIOS) ut heiderspris til ein overlege som har gjort særskild innsats innan faget. I år gjekk prisen til Annemarie Haag-Kvernberg ved Molde sjukehus.
- Ortopediske LIS i heile landet kan nominere overlegar ved avdelinga si til LIOS (Leger I Ortopedisk Spesialisering) sin heiderspris. Den blir delt ut til ein som gir kniven vidare, brenn for utdanninga til LIS og generelt er eit godt førebilete. Det var veldig hyggeleg å lese nominasjonsteksten om Annemarie Haag-Kvernberg som var innsendt frå legar i spesialisering i avdelinga hennar. Gratulerer med eit godt utdanningsmiljø for ortopediske LIS ved sjukehusa dykkar, seier Ishanee Nirmalanathan, leiar i LIOS-styret.
– Velfortent
Klinikksjef Britt Rakvåg Roald er svært fornøgd med tildelinga av heidersprisen.
– Ho er nominert av legar i spesialisering (LIS) som har vore og er i Molde, og prisen er velfortent for den innsatsen ho gjer for å gjere sjukehuset til ein attraktiv læringsarena innan ortopedi.