Kapselendoskopi av tynntarm
Ved kapselsendoskopi kan vi undersøkje om det er sjukdommar i tynntarmen. Det er vanlegast ved mistanke om bløding der andre undersøkingar ikkje har gitt noka god forklaring. Du svelgjer ein kapsel (11 x 26 mm) med innebygd kamera som tek bilete gjennom tynntarmen. Undersøkinga varer i 12 timar og bileta blir lagra i ei biletboks som du ber på deg.
Før
For å få best mogleg kvalitet på bileta må tynntarmen vere heilt rein. Du må derfor kjøpe tømmingsmiddel som Citrafleet eller Picoprep på apotek. Les informasjonen om korleis du tømmer tarmen nøye.
Dagen før undersøkinga – tøm tarmen
Dagen før undersøkinga kan du ete ein lett lunsj klokka 13. Deretter må du ikkje ete fast føde.
Klokka 18 dagen før undersøkinga skal du bruke tømmemiddelet.
- Fyll eit glas med 1 ½ dl vatn.
- Hell innhaldet av ein pose tømmingsmiddel i glaset.
- Rør om i 2–3 minutt til alt pulveret er fullstendig oppløyst. Blandinga vil vere uklar og kan bli varm. Avkjøl den eventuelt før du drikk den.
Drikk deretter 2 liter fordelte på 5 dl kvar time. Du kan drikke vatn, buljong, saft, brus og mineralvatn, kaffi eller te.
Du må halde deg i nærleiken av eit toalett etter å ha teke tømmingsmiddelet. Det er individuelt kor langt tid det tek før preparatet verkar – det kan gå fleire timar før effekten kjem.
Dagen du skal undersøkjast
Du skal ikkje ete eller drikke noko dei siste åtte timane før undersøkinga. Om du bruker livsviktige medisinar, kan du ta det klokka 06.00 med eit halvt glas vatn. Andre medisinar kan du ta med til sjukehuset og ta når kapselen har komme inn i tynntarmen. Dette får du informasjon om av sjukepleiar.
Har du diabetes og bruker insulin, kan du kontakte oss for å få time tidleg på dagen.
Under
Du blir teken imot av ein sjukepleiar som koplar til utstyret og startar opp undersøkinga. Vi tilrår at du har på deg ei bukse med strikk i livet og T-skjorte. Piercing i navlen må fjernast. Du får eit glas vatn tilsett nokre dropar Minifom for å fjerne luftbobler i tarmen.
Du får eit belte rundt magen. Sensorane i beltet blir kopla til ein opptakar som du ber i ei skulderveske. Det er viktig at du ikkje tek av beltet dei 12 timane opptaket går føre seg. Du får ein kapsel (kamera) som du svelgjer ved å drikke eit glas vatn.
For at kapselen skal flytte seg raskt over frå magesekk til tarmen, er det best at du er i aktivitet dei første to timane. Etter cirka éin time kontrollerer vi posisjonen til kapselen. Dersom han har flytta seg frå magesekken til tarmen, kan du reise heim.
No kan du drikke vatn, men du må vente to timar til til du kan ete.
Det er fint med naturleg aktivitet under heile undersøkinga, men du bør unngå større fysiske anstrengingar. Unngå opphald i nærleiken av sterke elektromagnetiske felt, som til dømes MR-undersøking. Radiosendarar kan også påverke kvaliteten på bileta. Hugs å behandle utstyret forsiktig – det må ikkje utsetjast for vatn, støyt, vibrasjonar eller direkte sollys.
Gjer det vondt?
Undersøkinga gjer ikkje vondt.
Kor lenge varer undersøkinga?
Undersøkinga varer i 12 timar.
Etter
Etter 12 timar avsluttar du undersøkinga ved å ta av beltet og skulderveska. Lever alt utstyret samla til sjukehuset etter avtale. Sjølve kapselen kjem ut på naturleg måte med avføringa og skal ikkje leverast tilbake.
Når får eg resultatet?
Bilete frå undersøkinga vil bli behandla i eit biletprogram. Resultatet vil bli sendt til legen som har tilvist deg.
Ver merksam
Det er sjeldan komplikasjonar ved kapselsendoskopi. Er det svært tronge parti i tarmen, kan kapselen stoppe opp og må då fjernast med endoskop eller operasjon.
Kontakt
Ålesund sjukehus
Poliklinikk for mage/tarmsjukdommar Ålesund
Ventetid: 12 uker
Ventetid: 12 uker
Kontakt Poliklinikk for mage/tarmsjukdommar ÅlesundOppmøtestad
Poliklinikk for mage- og tarmsjukdommar er lokalisert i 4. etasje i lågblokka, på nordsida av sjukehuset. Gå til poliklinikkane, inngang nord (Åsehaugen 5A) og følg den grøne streken på veggen.
Adresse
- I dag 08:00 - 16:00
Ålesund sjukehus
Åsehaugen 5
Transport
Parkering
Besøksparkering på tilvist stad på sjukehusområdet, like ved innkøyringa til sjukehuset. Sjå kart over sjukehusområdet.
- Merk at du alltid må registrere bilnummeret på parkeringsautomat eller i EasyPark-appen ved ankomst.
- Vi anbefaler betaling med kort framfor mynt. Då kan du velje P-tid med god margin slik at du unngår stress for å nå parkeringstida. Kjem du tilbake før utløpt tid kan du avslutte ved å sette inn kortet igjen. Du betaler då kun for brukt parkeringstid.
- Det er også mogleg å betale med mynt, men då må du tilbake til automaten viss du må forlenge parkeringstida. Du får heller ikkje refundert beløp om du forlater plassen tidlegare.
- Appen EasyPark er også eit godt betalingalternativ.
- Besøkande med HC-kort har betalingsfritak på parkeringsplassar med HC-merking.
Stengde inngangsparti i samband med byggearbeid
Poliklinikkinngangen er stengt
20. november 2023 stengde vi poliklinikkinngangen, (inngang nord, Åsehaugen 5a) og la om parkeringsområda ved Ålesund sjukehus i samband med ombygging.
Inngang A til psykiatribygget er stengt
9. september 2024 stengde vi inngang A ved psykiatribygget (Åsehaugen 7a). Pasientar, pårørande og andre besøkande skal bruke inngang på austsida for å kome til psykiatribygget (punkt 13 på bildet). Tilkomst via gangsti frå hovudinngangen (Åsehaugen 5d) på sjukehuset.
Grøn markering: Parkering for pasientar/besøkande
Gul markering: HC-parkering
Raud markering: Parkering for blodgivarar
Blå markering: Parkering for besøkande med spesialbevis