Overvektspoliklinikken har fått kvalitetspris
Norsk kvalitetsregister for fedmekirurgi (SOReg-N) har tildelt overvektspoliklinikken ved Ålesund sjukehus og Sykehuset Innlandet SOReg-prisen for mest komplette innmeldingar av operasjonar i 2016.
Sjukepleiarane Mona Uggedal og Anne Berit Dalhaug står for registreringa som har gitt pris til Ålesund sjukehus. Dei starta med denne registreringa i slutten av 2015, då det vart bestemt at Ålesund sjukehus skulle delta i SOReg-N. Dei skildrar det som ei grundig registrering som kan bidra til å utvikle tilbodet til pasientane.
Prisen kom som ei positiv overrasking på dei to sjukepleiarane. Den blei utdelt 6. april på den årlege SOReg-dagen i Bergen.
Grunngjeving SOReg-prisen 2018
Årets pris vart tildelt to sjukehus: Sykehuset Innlandet og Ålesund sjukehus, for framifrå innsats med registreringsarbeidet til SOReg-N.
I samband med årsrapporten for 2016 fekk SOReg-N utarbeida dekningsgradsanalyse frå Folkehelseinstituttet. Her vart tala for registrerte pasientar i SOReg-N samanlikna med tal på innrapporterte fedmeopererte til Norsk Pasientregister (NPR). I tillegg vart tala kopla slik at ein kunne sjå om det var dei same pasientane som hadde blitt registrert i begge registra.
Sykehuset Innlandet hadde rapportert 225 pasientar til SOReg-N og alle desse var med blant dei 227 pasientane som var rapportert til NPR. Dette gir ein dekningsgrad på 99%.
Ålesund Sjukehus hadde registrert 40 pasientar i SOReg-N og dei same 40 pasientane var rapportert til NPR, altså ein dekningsgrad på 100%.
Dette er framifrå resultat, og registeret vil med denne prisen takke for godt arbeid!
Fakta om SOReg
- Scandinavian Obesity Surgery Registry (SOReg) vart først utvikla og tatt i bruk i Sverige (SOReg-S) i 2007.
- Norsk kvalitetsregister for fedmekirurgi (SOReg-N) er bygd opp i nært samarbeid med og på same måte som det svenske registeret
- SOReg-N skal kartlegge kor mange som blir fedmeoperert i Noreg, og gi eit bilete av kvaliteten på behandlinga.
- Det er eit mål at alle som utfører fedmekirurgi i Noreg skal kunne legge inn opplysingar om pasientane dei behandlar.
- Å delta i kvalitetsregisteret er frivillig, og pasienten blir spurt om han/ho samtykker til at opplysingane blir registrert i databasen
- Eit felles skandinavisk register gjer det mogeleg å samle inn opplysingar frå fleire land og dermed oppnå eit større samanlikningsgrunnlag for å kunne vurdere kvaliteten på og effekten av kirurgi
Kilde: helse-bergen.no