Klart for oppstart av legeutdanning i Ålesund til hausten

- I lag med NTNU i Ålesund og Ålesund kommune er vi glade og nøgde over å kunne tilby dette studietilbodet til hausten med mål om å bidra til auka rekruttering til Møre og Romsdal som helseregion og kapasitet på legeutdanninga i landet, fortel fagdirektør i Helse Møre og Romsdal, Erik Solligård.​​​

Det desentraliserte studieløpet, betre kjent som NTNU Link​​, gir inntil 20 studentar som har fullført dei to første åra av medisinstudiet ved NTNU Trondheim moglegheit til å ta dei neste to åra av utdanninga i Ålesund. Sjukehuset Levanger har hatt dette studieløpet sidan 2018.

Studiemodellen som skal nyttast i Ålesund har fokus på studentaktiv undervising og nær pasientkontakt i realistiske situasjonar i sjukehus og kommunehelseteneste. ​​

I september 2019 kom Grimstadutvalget med ein anbefaling​ om å auke talet plassar på medisinutdanninga i Noreg​. Innføringa av desentralisert legeutdanning til Ålesund er dermed​ eit svar og​ tiltak som har som mål å auke denne kapasiteten.

​​Ønskjer studentane hjarteleg velkomen til Ålesund

- Vi har alle eit felles mål om å gi studentane eit best mogleg tilbod, og hos oss vil dei få motivasjon til å arbeide med faga ved hjelp av plenumundervising der dei har ei aktiv rolle og klinisk teneste med mykje pasientkontakt.

- Vi gler oss til å ønskje dei nye studentane velkomen, og å inkludere dei i det flotte studiemiljøet på campus Ålesund. Det er allereie eit godt fagleg samarbeid mellom NTNU og helseføretaket, og NTNU i Ålesund har eit aktivt studiemiljø med gode undervisingsfasilitetar som studentane vil ha stor nytte av.
​