Erik Ganesh Søegaard er tilsett som fagdirektør
- Vi er veldig glad for at Erik Ganesh Søegaard har takka ja til å bli ny fagdirektør i Helse Møre og Romsdal, seier administrerande direktør Olav Lødemel.
Søegaard arbeider i dag som klinikkleiar for psykisk helsevern og rus ved Diakonhjemmet Sykehus. Han har jobba 15 år i spesialisthelsetenesta, sju av desse som leiar, og har god erfaring med å leie krevande omstillingsprosessar.
- Erik har synt stor kapasitet og gitt eit solid inntrykk. Med sin breidde innan både jus, medisin og leiing tenkjer eg han er rett person for oppgåva. Konkret erfaring med omstilling i spesialisthelsetenesta er òg viktig for oss. Eg gleder meg til å jobbe med Erik framover, seier Olav Lødemel.
Erik Ganesh Søegaard har doktorgrad i medisin, og disputerte i januar 2024 med "Biopsychosocial consequences of trauma". Søegaard er spesialist i psykiatri, og han har fleire bachelorgradar innan helseleiing og helseøkonomi, samfunnsøkonomi og psykologi, samt nasjonalt toppleiarprogram for kommune- og spesialisthelsetenesta. Vidare har han mastergrad i rettsvitenskap med ei masteroppgåve om juridiske konsekvensar av alvorlege hendingar i helsetenesta.
- Eg ser fram til å bli ein del av Helse Møre og Romsdal og bidra til utviklinga av eit helseføretak som er i ein spennande posisjon, både teknologisk og organisatorisk. Denne mogleheita gir meg sjansen til å bruke erfaringa mi i ei rolle med stor påvirkningskraft, samtidig som eg gler meg til å samarbeide med det dyktige fagmiljøet, seier Søegaard.
Han legg til at familien har hytte på Smøla, og naturen og kulturen der alltid har fasinert meg. Eg ser fram til å bli endå betre kjent med området og medvirke til å utvikle helsetenesten i ein heilt unik region.
Etter planen tiltrer Søegaard seinast 1. februar 2025.