Metakolintest for barn og unge, Ålesund

Dersom du dei siste 2 vekene har hatt, eller har ein pågåande luftvegsinfeksjon med feber eller er tydeleg forverra av astmaen din, vil det vere aktuelt å utsette testen. Det same dersom du nyleg har hatt store allergiske plager. Det er for at resultatet av testen skal bli mest mogleg rett.

Ved denne testen må det vere opphald av følgande medisinar før testen (dersom ikkje anna er avtalt med lege på førehand):

• Montelukast/Singulair: 4 døgn
• Antihistamin som Cetirizin/Zyrtec, Aerius, Clarityn, Tavegyl, Polaramin m. fleire: 72 timar
• Førebyggande inhalasjonsmedisinar som: Oxis, Serevent, Seretide, Symbicort: 36 timar
• Hurtigverkande inhalasjonsmedisinar som: Airomir, Atrovent, Bricanyl, Buventol, Ventoline: 8 timar

Mannitol eller metakolin er stoff som kan gi samantrekking i luftvegane (som ved astmatisk bryderi). Dette skjer lettare hos personar med astma. Testen avklarer grad av over-reaktivitet i luftvegane.

Testen startar med ein spirometri.

Deretter kan du inhalere Mannitol (pulver) eller metakolin (damp) i aukande dosar med ny spirometri mellom kvar dose. Testen blir avbroten når det det blir klart fall i lungefunksjon, ved symptom eller dersom det ikkje blir vist noka endring på høg dose (negativ test).

Ved fallande lungefunksjon blir det vanlegvis gitt astmamedisin etterpå (for eksempel Ventoline) og vi kontrollerer at lungefunksjonen blir normalisert.

Formålet med testen er å måle kor mykje/lite som skal til for å få ein astmaliknande reaksjon i bronkiane. Nokon vil få symptom på dette, andre kjenner ingenting. Etter å ha fått vanleg astmamedisin skal lungefunksjonen vere normalisert og det er ikkje vanleg med plager etter at testen er fullført. Nokre få vil i etterkant av testen ha behov for meir medisin enn vanleg på grunn av symptom.

Resultatet av undersøkinga vil som regel bli gitt i samanheng med legekonsultasjonen i etterkant.