Spesialisert rehabilitering i Helse Møre og Romsdal er samla ved Ålesund sjukehus

I desember 2024 vart det bestemt at det spesialiserte rehabiliteringstilbodet ved Aure rehabiliteringssenter skal leggast ned. Dette betyr at all spesialisert rehabilitering i Helse Møre og Romsdal no er samla ved Ålesund sjukehus. Omstillinga har også ført til at tilbodet i Ålesund har blitt meir poliklinisk og ambulant, med færre døgnsenger. Det er no meir fokus på tidleg rehabilitering i døgnavdelinga.

Frå 1. januar 2025 er det 20 tilgjengelege senger på døgnposten og 4 senger på pasienthotellet Åse hotell.

Inntakskriteria og tilbodet har ikkje endra seg som følgje av omstillingane. Vi vurderer tilvisingar etter dei same kriteria som før. Pasientar som treng spesialisert rehabilitering, vil framleis få tilbod hos oss. Vi har vekentlege inntaksmøte, men tilvisingar blir vurderte fortløpande for å unngå unødvendig ventetid for pasientar i subakutt fase etter skade eller sjukdom. Dersom det er tvil om pasienten sitt rehabiliteringsbehov, tilbyr vi ambulant eller poliklinisk vurdering for avklaring.

Pasientgrupper som får tilbod om spesialisert rehabilitering

• Erverva hjerneskade (etter sjukdom eller skade).
• Ryggmargsskade.
• Amputasjonar av underekstremitetar.
• Multitraume.
• Kroniske og subakutte nevrologiske sjukdomar.
• Intensivoverlevarar (PICS).
• Kreft (med skade i sentralnervesystemet).